Re: திருக்குறள்.

by மகி Thu Oct 15, 2009 6:34 am

அறத்துப்பால்

அதிகாரம்: நீத்தார் பெருமை

குறள் எண்: 26

செயற்கரிய செய்வார் பெரியர் சிறியர்
செயற்கரிய செய்கலா தார்.

விளக்கம்:

செய்வதற்கு அருமையான செயல்களை செய்ய வல்லவரே பெரியோர். செய்வதற்கு அரிய செயல்களைச் செய்யமாட்டாதவர் சிறியோர்.

by மகி Fri Oct 16, 2009 5:37 am

அறத்துப்பால்

அதிகாரம்: நீத்தார் பெருமை

குறள் எண்: 27

சுவைஒளி ஊறுஓசை நாற்றமென ஐந்தின்
வகைதெரிவான் கட்டே உலகு.

விளக்கம்:

சுவை, ஒளி, ஊறு, ஓசை, நாற்றம் என்று சொல்லப்படும் ஐந்தின் வகைகளையும் ஆராய்ந்து அறிய வல்லவனுடைய அறிவில் உள்ளது உலகம்.

by மகி Sat Oct 17, 2009 6:54 am

அறத்துப்பால்

அதிகாரம்: நீத்தார் பெருமை

குறள் எண்: 28

நிறைமொழி மாந்தர் பெருமை நிலத்து
மறைமொழி காட்டி விடும்.

விளக்கம்:

பயன் நிறைந்த மொழிகளில் வல்ல சான்றோரின் பெருமையை, உலகத்தில் அழியாமல் விளங்கும் அவர்களுடைய மறைமொழிகளே காட்டிவிடும்.

by மகி Sun Oct 18, 2009 11:22 am

அறத்துப்பால்

அதிகாரம்: நீத்தார் பெருமை

குறள் எண்: 29

குணமென்னும் குன்றேறி நின்றார் வெகுளி
கணமேயும் காத்தல் அரிது.

விளக்கம்:

நல்ல பண்புகளாகிய மலையின்மேல் ஏறி நின்ற பெரியோர், ஒரு கணப்பொழுதே சினம் கொள்வார் ஆயினும் அதிலிருந்து ஒருவரைக் காத்தல் அரிதாகும்.

by மகி Mon Oct 19, 2009 6:46 am

அறத்துப்பால்

அதிகாரம்: நீத்தார் பெருமை

குறள் எண்: 30

அந்தணர் என்போர் அறவோர்மற் றெவ்வுயிர்க்கும்
செந்தண்மை பூண்டொழுக லான்.

விளக்கம்:

எல்லா உயிர்களிடத்திலும் செம்மையான அருளை மேற்கொண்டு ஒழுகுவதால், அறவோரே அந்தணர் எனப்படுவோர் ஆவர்.

by மகி Tue Oct 20, 2009 3:58 am

அறத்துப்பால்

அதிகாரம்: அறன்வலியுறுத்தல்

குறள் எண்: 31

சிறப்புஈனும் செல்வமும் ஈனும் அறத்தினூஉங்கு
ஆக்கம் எவனோ உயிர்க்கு.

விளக்கம்:

அறம் சிறப்பையும் அளிக்கும். செல்வத்தையும் அளிக்கும். ஆகையால் உயிர்க்கு அத்தகைய அறத்தை விட நன்மையானது வேறு யாது?.

by மகி Wed Oct 21, 2009 10:41 pm

அறத்துப்பால்

அதிகாரம்: அறன்வலியுறுத்தல்

குறள் எண்: 32

அறத்தினூஉங்கு ஆக்கமும் இல்லை அதனை
மறத்தலின் ஊங்கில்லை கேடு.

விளக்கம்:

ஒருவருடைய வாழ்கைக்கு அறத்தை விட நன்மையானதும் இல்லை. அறத்தை போற்றாமல் மறப்பதை விடக்கொடியதும் இல்லை.

by மகி Thu Oct 22, 2009 8:33 pm

அறத்துப்பால்

அதிகாரம்: அறன்வலியுறுத்தல்

குறள் எண்: 33

ஒல்லும் வகையான் அறவினை ஓவாதே
செல்லும்வாய் எல்லாஞ் செயல்.

விளக்கம்:

செய்யக்கூடிய வகையால், எக்காரணத்தாலும் விடாமல் செல்லுமிடமெல்லாம் அறச்செயலைப் போற்றிச் செய்ய வேண்டும்.

by மகி Sat Oct 24, 2009 12:53 am

அறத்துப்பால்

அதிகாரம்: அறன்வலியுறுத்தல்

குறள் எண்: 34

மனத்துக்கண் மாசிலன் ஆதல் அனைத்தறன்
ஆகுல நீர பிற.

விளக்கம்:

ஒருவன் தன்மனதில் குற்றம் இல்லாதவானாக இருக்க வேண்டும். அறம் அவ்வளவே: மனத்தூய்மை இல்லாத மற்றவை ஆரவாரத் தன்மை உடையவை.

by மகி Sat Oct 24, 2009 7:43 am

அறத்துப்பால்

அதிகாரம்: அறன்வலியுறுத்தல்

குறள் எண்: 35

அழுக்காறு அவாவெகுளி இன்னாச்சொல் நான்கும்
இழுக்கா இயன்றது அறம்.

விளக்கம்:

பொறாமை, ஆசை, சினம், கடுஞ்சொல் ஆகிய இந்த நான்கு குற்றங்களுக்கும் இடங்கொடுக்காமல் அவற்றைக் கடித்து ஒழுகுவதே அறமாகும்.

by மகி Sun Oct 25, 2009 4:49 am

அறத்துப்பால்

அதிகாரம்: அறன்வலியுறுத்தல்

குறள் எண்: 36

அன்றறிவாம் என்னாது அறஞ்செய்க மற்றது
பொன்றுங்கால் பொன்றாத் துணை.

விளக்கம்:

இளைஞராக உள்ளவர், பிற்காலத்தில் பார்த்து கொள்ளலாம் என்று எண்ணாமல் அறம் செய்ய வேண்டும். அதுவே உடல் அழியும் காலத்தில் அழியா துணையாகும்.

by மகி Mon Oct 26, 2009 2:54 am

அறத்துப்பால்

அதிகாரம்: அறன்வலியுறுத்தல்

குறள் எண்: 37

அறத்தாறு இதுவென வேண்டா சிவிகை
பொறுத்தானோடு ஊர்ந்தான் இடை.

விளக்கம்:

பல்லக்கை சுமப்பவனும் அதன்மேலிருந்து ஊர்ந்து செல்லுவோனுமாகிய அவர்களிடையே அறத்தின் பயன் இஃது என்று கூறவேண்டா.

by மகி Tue Oct 27, 2009 6:32 am

அறத்துப்பால்

அதிகாரம்: அறன்வலியுறுத்தல்

குறள் எண்: 38

வீழ்நாள் படாஅமை நன்றாற்றின் அஃதொருவன்
வாழ்நாள் வழியடைக்கும் கல்.

விளக்கம்:

ஒருவன் அறம் செய்ய தவறிய நாள் ஏற்படாதவாறு அறத்தை செய்வானானால் அதுவே அவன் உடலோடு வாழும் நாள் வரும் பிறவி வழியை அடைக்கும் கல்லாகும்.

by மகி Wed Oct 28, 2009 8:26 am

அறத்துப்பால்

அதிகாரம்: அறன்வலியுறுத்தல்

குறள் எண்: 39

அறத்தான் வருவதே இன்பம் மற்றெல்லாம்
புறத்த புகழும் இல.

விளக்கம்:

அறநெறியில் வாழ்வதன் பயனாக வருவதே இன்பமாகும். அறத்தோடு பொருந்தாமல் வருவன எல்லாம் இன்பம் இல்லாதவை: புகழும் இல்லாதவை.

by மகி Thu Oct 29, 2009 7:34 am

அறத்துப்பால்

அதிகாரம்: அறன்வலியுறுத்தல்

குறள் எண்: 40

செயற்பால தோரும் அறனே ஒருவற்கு
உயற்பால தோரும் பழி.

விளக்கம்:

ஒருவன் வாழ்நாளில் முயற்சி மேற்கொண்டு செய்யத்தக்கது அறமே. செய்யாமல் காத்து கொள்ளத்தக்கது பழியே.

by மகி Mon Nov 02, 2009 5:22 am

அறத்துப்பால்

அதிகாரம்: இல்வாழ்க்கை

குறள் எண்: 41

இல்வாழ்வான் என்பான் இயல்புடைய மூவர்க்கும்
நல்லாற்றின் நின்ற துணை.

விளக்கம்:

இல்லறத்தில் வாழ்பவனாகச் சொல்லப்படுகிறவன் அறத்தின் இயல்பை உடைய மூவருக்கும் நல்வழியில் நிலை பெற்ற துணையாவான்.

by மகி Tue Nov 03, 2009 12:04 pm

அறத்துப்பால்

அதிகாரம்: இல்வாழ்க்கை

குறள் எண்: 42

துறந்தார்க்கும் துவ்வாதவர்க்கும் இறந்தார்க்கும்
இல்வாழ்வான் என்பான் துணை.

விளக்கம்:

துறந்தவர்கும் வறியவர்க்கும் தன்னிடத்தே இறந்தவர்க்கும் இல்லறம் மேற்கொண்டு வாழ்கிறவன் துணையாவான்.

by மகி Thu Nov 05, 2009 5:44 am

அறத்துப்பால்

அதிகாரம்: இல்வாழ்க்கை

குறள் எண்: 43

தென்புலத்தார் தெய்வம் விருந்தொக்கல் தானென்றாங்கு
ஐம்புலத்தாறு ஓம்பல் தலை.

விளக்கம்:

தென்புலத்தார், தெய்வம் விருந்தினர், சுற்றத்தார், தான் என்ற ஐவகையிடத்தும் அறநெறி தவறாமல் போற்றுதல் சிறந்த கடமையாகும்.

by மகி Fri Nov 06, 2009 1:44 am

அறத்துப்பால்

அதிகாரம்: இல்வாழ்க்கை

குறள் எண்: 44

பழியஞ்சிப் பாத்தூண் உடைத்தாயின் வாழ்க்கை
வழியெஞ்சல் எஞ்ஞான்றும் இல்.

விளக்கம்:

பொருள் சேர்க்கும் பொது பழிக்கு அஞ்சிச் சேர்த்து, செலவு செய்யும் போது பகுந்து உண்பதை மேற்க்கொண்டால், அவ்வாழ்கையின் ஒழுங்கு எப்போதும் குறைவதில்லை.

by மகி Thu Jan 28, 2010 12:06 am

அறத்துப்பால்

அதிகாரம்: இல்வாழ்க்கை

குறள் எண்: 45

அன்பும் அறனும் உடைத்தாயின் இல்வாழ்க்கை
பண்பும் பயனும் அது.

விளக்கம்:

இல்வாழ்க்கையின் அன்பும் அறமும் உடையதாக விளங்குமானால், அந்த வாழக்கையின் பண்பும் பயனும் அதுவே ஆகும்.

by மகி Fri Jan 29, 2010 10:31 pm

அறத்துப்பால்

அதிகாரம்: இல்வாழ்க்கை

குறள் எண்: 46

அறத்தாற்றின் இல்வாழ்க்கை ஆற்றின் புறத்தாற்றில்
போஒய்ப் பெறுவ எவன்.

விளக்கம்:

ஒருவன் அறநெறியில் இல்வாழ்க்கையைச் செலுத்தி வாழ்வானானால், அத்தகையவன் வேறு நெறியில் சென்று பெறத்தக்கது என்ன?.

by மகி Mon Feb 01, 2010 8:05 am

அறத்துப்பால்

அதிகாரம்: இல்வாழ்க்கை

குறள் எண்: 47

இயல்பினான் இல்வாழ்க்கை வாழ்பவன் என்பான்
முயல்வாருள் எல்லாம் தலை.

விளக்கம்:

அறத்தின் இயல்பொடு இல்வாழ்கை வாழ்கிறவன்- வாழ முயல்கிறவன் பல திறத்தாரிலும் மேம்பட்டு விளங்குகிறவன் ஆவான்.

by மகி Fri Feb 26, 2010 4:28 am

அறத்துப்பால்

அதிகாரம்: இல்வாழ்க்கை

குறள் எண்: 48

ஆற்றின் ஒழுக்கி அறனிழுக்கா இல்வாழ்க்கை
நோற்பாரின் நோன்மை உடைத்து.

விளக்கம்:

மற்றவரை அறநெறியில் ஒழுகச்செய்து தானும்அறம் தவறாத இல்வாழ்க்கை, தவம் செய்வாரைவிட மிகச்சிறந்த வல்லமை உடைய வாழ்க்கையாகும்.

by மகி Wed Mar 31, 2010 4:21 am

அறத்துப்பால்

அதிகாரம்: இல்வாழ்க்கை

குறள் எண்: 49

அறனென்ப் பட்டதே இல்வாழ்க்கை அஃதும்
பிறன்பழிப்ப தில்லாயின் நன்று.

விளக்கம்:

அறம் என்று சிறப்பித்து சொல்லப்பட்டது இல்வாழ்க்கையே ஆகும். அதுவும் மற்றவன் பழிக்கும் குற்றம் இல்லாமல் விளங்கினால் மேலும் நன்மையாகும்.

by மகி Thu Apr 01, 2010 4:58 am

அறத்துப்பால்

அதிகாரம்: இல்வாழ்க்கை

குறள் எண்: 50

வையத்துள் வாழ்வாங்கு வாழ்பவன் வான்உநற்யும்
தெய்வத்துள் வைக்கப் படும்.

விளக்கம்:

உலகத்தில் வாழவேண்டிய அறநெறியில் நின்று வாழ்கிறவன், வானுலகத்தில் உள்ள தெய்வ முறையில் வைத்து மதிக்கப்படுவான்.

by Sponsored content