வான்வழி தற்கொலைத் தாக்குதல் நடத்த லஷ்கர் திட்டம்: உளவுத்துறை!

by மகி Fri Jan 22, 2010 10:59 pm

வானில் மனிதர்கள் பறக்க உதவும் பாரா-கிளைடிங் உபகரணங்களை அதிகளவில் லஷ்கர்-இ-தயீபா பயங்கரவாத அமைப்பு வாங்கியுள்ளதால், இந்தியப் பகுதியில் வான்வழி தற்கொலைத் தாக்குதல் நடத்த வாய்ப்புள்ளதாக உளவுத்துறை எச்சரிக்கை விடுத்துள்ளது.

குடியரசு தினக் கொண்டாட்டங்கள் நடைபெற உள்ள நிலையில், வான்வழி தற்கொலைத் தாக்குதல் குறித்து உளவுத்துறை எச்சரிக்கை விடுத்துள்ளதைத் தொடர்ந்து தலைநகர் டெல்லி உள்ளிட்ட முக்கிய நகரங்களில் பாதுகாப்பை பலப்படுத்துமாறு மத்திய அரசு உத்தரவிட்டுள்ளது.

ஐரோப்பாவில் உள்ள தங்களின் தகவல் தொடர்புகள் மூலம் லஷ்கர் அமைப்பு சுமார் 50க்கும் அதிகமான பாரா-கிளைடிங் உபகரணங்களை அந்நாட்டில் இருந்து வாங்கியதை இந்திய உளவுத்துறை கண்டறிந்ததாக தகவல்கள் தெரிவிக்கின்றன.

லஷ்கரின் வான்வழி தற்கொலைத் தாக்குதல்களை முறியடிக்க பாதுகாப்பு அமைப்புகளின் சார்பில் ஏற்கனவே பயிற்சிகள் மேற்கொள்ளப்பட்டது குறிப்பிடத்தக்கது.
லஷ்கர்-இ-தயீபா அல்லது இதர பயங்கரவாத குழுக்களைச் சேர்ந்தவர்கள் தெற்காசிய நாடுகளுக்கு செல்லும் இந்தியா விமானத்தைக் கடத்த சதித்திட்டம் தீட்டியுள்ளதாக மத்திய அரசு ஏற்கனவே எச்சரிக்கை விடுத்துள்ளது.

நன்றி: வெப்துனியா.