சத்தீஸ்கரில் நக்ஸல்கள் தாக்குதல்: 76 போலீஸார் பலி

by **aarul** Wed Apr 07, 2010 7:27 am

[You must be registered and logged in to see this image.]

சத்தீஸ்கரில்
உள்ள தாந்தேவாடா காட்டுப்பகுதியில் நக்ஸல்கள் நடத்திய திடீர் தாக்குதலில்
காயம் அடைந்த மத்திய ரிசர்வ் போலீஸ் படை வீரர், ஜகதல்பூரில் உள்ள
மருத்துவமனைக்கு சிகிச்சைக்காக அழைத்துச் செல்லப்படுகிறார்.

ராய்ப்பூர்,
ஏப்.6: சத்தீஸ்கர் மாநிலம் தாந்தேவாடா மாவட்ட வனப்பகுதியில்
செவ்வாய்க்கிழமை நக்ஸல்கள் நடத்திய கொடூர தாக்குதலில் 75 மத்திய ரிசர்வ்
படை (சிஆர்பிஎப்) போலீஸாரும் மாநில காவலர் ஒருவரும் பலியாகினர். இந்த சம்பவம் பற்றி அறிந்த பிரதமர் மன்மோகன் சிங்கும் உள்துறை அமைச்சர் ப.சிதம்பரமும் அதிர்ச்சியும் வேதனையும் தெரிவித்துள்ளனர்.
சிதம்பரத்துடன் தொலைபேசியில் தொடர்புகொண்டு பேசிய பிரதமர் மன்மோகன்
சிங், தற்போதைய நிலவரம் பற்றி அறிக்கை அனுப்பும்படி உத்தரவிட்டுள்ளார். சத்தீஸ்கர் மாநிலத்தில் நக்ஸல்கள் நடமாட்டம் அதிகமிக்க பகுதிகளில் தாந்தேவாடா மாவட்ட வனப்பகுதியும் ஒன்று.
இந்த பகுதியில் நக்ஸல் ஒழிப்பு வேட்டை (பசுமைவேட்டை) மேற்கொள்ள கடந்த 3
நாள்களாக சிஆர்பிஎப் (மத்திய ரிசர்வ் போலீஸ்படை) வீரர்களும் மாநில
போலீஸாரும் இணைந்து தர்மேத்லா வனப்பகுதியில் முகாமிட்டு வந்தனர்.
தாந்தேவாடா மாவட்டத்தில் உள்ள முக்ரானா வனப்பகுதியில் மூலை முடுக்கெல்லாம்
சென்று பாதை, வன, நில அமைப்பை அறிந்துகொள்ள முயன்றனர். நக்ஸல்களுக்கு
எதிராக தாக்குதல் நடத்த வசதியாக சாலை ஒன்றை அமைத்துவிட்டு முகாம்களுக்கு
செவ்வாய்க்கிழமை காலை திரும்பிக்கொண்டிருந்தனர். சிஆர்பிஎப்
வீரர்கள், மாநில போலீஸார் என 100 பேர் வந்தபோது வனப்பகுதியில்
பதுங்கியிருந்த சுமார் 1000 நக்ஸல்கள் அவர்களை சுற்றிவளைத்து தாக்குதல்
நடத்தினர். இதில் இறந்தவர்களில் 75 பேர் சிஆர்பிஎப் வீரர்கள். இவர்களில் ஒருவர் சிஆர்பிஎப் துணை கமான்டன்ட் மற்றொருவர் உதவி கமான்டன்ட் ஆவர்.
காலை 6 மணியிலிருந்து 7 மணிக்குள் இந்த தாக்குதல் நடந்தது. சிஆர்பிஎப்
வீரர்களை ஏற்றிவந்த வாகனம் மீது முதலில் தாக்குதல் நடத்தி அதைத்
தகர்த்தனர் நக்ஸல்கள். இந்த சம்பவம் நடந்தது தாந்தேவாடாவில் உள்ள
சிந்தால்நர்-தர்மேத்லா கிராமம் அருகே என்று தாந்தேவாடா காவல் துறை
கண்காணிப்பாளர் அமரேஷ் மிஸ்ரா கூறினார். இந்த தாக்குதலுக்குப்
பிறகு பாதுகாத்துக்கொள்ள படை வீரர்கள் முயன்றபோது குன்றின் உச்சியில்
நின்றபடி துப்பாக்கிகளால் நக்ஸல்கள் சுட்டனர். நக்ஸல்கள் புதைத்து வைத்திருந்த குண்டுவெடித்ததில் கண்ணிவெடிகள் அகற்றும் வாகனமும் சிதறி அதன் டிரைவரும் உயிரிழந்தார்.
அதைத் தொடர்ந்து படைவீரர்களுக்கும் மாவோயிஸ்டுகளுக்கும் இடையே பலத்த
துப்பாக்கிச்சண்டை மூண்டது என காவல்துறை வட்டாரங்கள் தெரிவித்தன. சம்பவம் நடந்த வனப்பகுதியில் அடிபட்டு காயம் அடைந்த 8 சிஆர்பிஎப் வீரர்கள் சிகிச்சைக்காக ஹெலிகாப்டரில் கொண்டுசெல்லப்பட்டனர். எல்லா உடல்களும் மீட்கப்பட்டுவிட்டன என மாநில காவல்துறை தலைவர் விஸ்வ ரஞ்சன் தெரிவித்தார். தில்லியிலிருந்து சிஆர்பிஎப் தலைமை இயக்குநர் விக்ரம் ஸ்ரீவத்ஸவா, வனப்பகுதிக்கு விரைந்து சம்பவ இடத்தை பார்வையிட்டார்.
நக்ஸல் ஒழிப்புப்படைக்கு கமாண்டராக பொறுப்பு வகிக்கும் சிஆர்பிஎப் சிறப்பு
தலைமை இயக்குநர் விஜய ராமனும் சம்பவ இடத்துக்கு விரைந்தார். கூடுதல் படை
அனுப்பி தேடுதல் வேட்டை முடுக்கிவிடப்பட்டுள்ளது என்றும் அவர் சொன்னார்.
சில பொய்த்தகவல்களை வேண்டும் என்றே பரப்பி படை வீரர்களை மரணக்குழியில்
விழ வைத்திருக்கிறார்கள் என்று உள்துறை அமைச்சக வட்டாரங்கள் தெரிவித்தன.தேசிய பாதுகாப்பு கவுன்சில் கூட்டம்: நக்ஸல்கள்
நடத்திய இந்த கொடூர தாக்குதலை அடுத்து பிரதமர் மன்மோகன் சிங் தலைமையில்
தேசிய பாதுகாப்பு கவுன்சில் தில்லியில் கூடியது. இதில் நக்ஸல் தாக்குதல்
பற்றி விவாதிக்கப்பட்டது. இந்த கூட்டத்தில் உள்துறை அமைச்சர்
ப.சிதம்பரம், இதர சில அமைச்சர்கள், முப்படைத் தலைவர்கள் பங்கேற்றனர்.
அதிகாரிகளுடன் முதல்வர் ஆலோசனை :மத்திய படையினர் மீது
நக்ஸல்கள் தாக்குதல் நடத்தியதை அடுத்து மாநில முதல்வர் ரமண் சிங் உயர்
அதிகாரிகளை அழைத்து அவசர ஆலோசனை நடத்தினார். நக்ஸல்களின் கொடூர முகத்தை இந்த தாக்குதல் வெளிப்படுத்துகிறது என்று ரமண் சிங் குறிப்பிட்டார்.
இருநாள்களுக்கு முன்னர்தான் ஒரிசாவில் உள்ள கோராபுட் மாவட்டத்தில்
நக்ஸல்கள் நடத்திய தாக்குதலில் 11 படைவீரர்கள் பலியாகினர். இப்போது
சத்தீஸ்கரில் இந்த தாக்குதல் நடந்துள்ளது. தாக்குதல் மேல் தாக்குதல்
நடப்பது அனைவரையும் அதிர்ச்சி அடையச் செய்துள்ளது. இது போல் பல
தாக்குதல்களை நக்ஸல்கள் தொடர்ந்து நடத்தி வருகின்றனர். பிப்ரவரி
15-ம் தேதி மேற்கு வங்கத்தில் மிதுனபுரி மாவட்டத்தில் பாதுகாப்புப் படை
முகாம் மீது நக்ஸல்கள் நடத்திய தாக்குதலில் 24 பேர் கொல்லப்பட்டனர்.