ராகுல் சென்ற ரயில் மீது கல்வீச்சு!

காங்கிரஸ் பொதுச் செயலாளர் ராகுல் காந்தி சென்ற சதாப்தி ரயில் மீது விஷமிகள் கல்வீசி தாக்குதல் நடத்தினர். இதில் ராகுல் உள்பட யாருக்கும் காயம் ஏற்படவில்லை.

ஹரியாணா மாநிலம் பானிபட் அருகே செவ்வாய்க்கிழமை இரவு 9.50 மணி அளவில் ரயில் சென்று கொண்டிருந்த போது ராகுல் பயணித்த பெட்டி உள்பட 5 பெட்டிகளின் மீது தாக்குதல் நடத்தப்பட்டது. இந்த கல்வீச்சில் ரயில் பெட்டிகளின் ஜன்னல்கள் மட்டும் சேதம் அடைந்ததாக அதிகாரப்பூர்வ வட்டாரங்கள் தெரிவித்தன.

நாட்டின் பெரும்பாலான பகுதிகளில் வறட்சி ஏற்பட்டுள்ளதால் அமைச்சர்கள் சிக்கன நடவடிக்கையைக் கடைப்பிடிக்க வேண்டுமென கட்சித் தலைவர் சோனியா காந்தி அழைப்பு விடுத்தார். காங்கிரஸ் அமைச்சர்கள், எம்.பி.க்கள், எம்எல்ஏக்கள் அனைவரும் தங்களது சம்பளத்தில் ஒரு குறிப்பிட்ட தொகையை வறட்சி நிவாரணத்துக்கு அளிக்க வேண்டும் என்றும் கட்டளையிட்டிருந்தார்.

இந்நிலையில் மத்திய நிதி அமைச்சர் பிரணாப் முகர்ஜி, நட்சத்திர ஹோட்டலில் தங்கியிருந்த அமைச்சர்கள் எஸ்.எம். கிருஷ்ணா, சசி தரூர் ஆகியோர் அரசு பங்களாக்களில் தங்க வேண்டும் என உத்தரவிட்டார். அத்துடன் தாமும் விமானத்தில் சாதாரண வகுப்பில் பயணம் மேற்கொண்டார். இதையடுத்து மத்திய அமைச்சர்கள் சாதாரண வகுப்பில் பயணம் செய்வது அதிகரித்துள்ளது.

இந்நிலையில் காங்கிரஸ் கட்சியின் பொதுச் செயலரும், எம்.பியுமான ராகுல் காந்தி, சதாப்தி ரயிலில் தில்லியிலிருந்து லூதியானாவுக்குப் பயணம் மேற்கொண்டார். மும்பைக்கு சாதாரண வகுப்பில் சோனியா விமான பயணம் மேற்கொண்ட அடுத்த நாளே ராகுல், ரயில் பயணம் மேற்கொண்டிருப்பது குறிப்பிடத்தக்கது.

ரயில் நிலையத்தில் அவருக்கு மலர் கொத்து அளிக்கப்பட்டதையும் அவர் ஏற்கவில்லை. இவையனைத்தும் உயர் வகுப்புப் பயணிகளுக்கு அளிக்கப்படுவது என்று கூறி அதை நிராகரித்தார். அத்துடன் பயணத்தின்போது மற்ற பயணிகளுக்கு அளிக்கப்படுவதைப் போன்ற பிளாஸ்டிக் டம்ப்ளரில் தண்ணீர் குடித்தார். தங்களுடன் ராகுல் காந்தி ரயிலில் பயணம் செய்வது கண்டு பயணிகள் மிகுந்த உற்சாகம் அடைந்தனர்.

ராகுல் காந்தி ரயிலில் பயணம் செய்வதன் மூலம் மக்களின் கஷ்டத்தை, குறிப்பாக ரயில் பயணிகளின் சிரமத்தை அவர் நேரடியாக பார்த்து அறிய முடியும் என்று ஒரு பயணி குறிப்பிட்டார்.

ராகுல் காந்தி எங்களுடன் ரயிலில் பயணம் செய்வது மிகுந்த மகிழ்ச்சியை அளிப்பதாக ஒரு பெண் பயணி குறிப்பிட்டார்.

ராகுல் காந்திக்கு பயணத்தின்போது பரோட்டா, தயிர் வடை, பழங்கள் அளித்ததாக ரயில்வே ஊழியர்கள் தெரிவித்தனர். இவை அனைத்தும் ராகுலுக்காக சிறப்பாக தயாரிக்கப்பட்டவை என்றும் அவர்கள் தெரிவித்தனர்.

லூதியானாவில் நான்கு நாள் நடைபெறும் இளைஞர் காங்கிரஸ் மாநாட்டை தொடங்கி வைப்பதற்காக ரயிலில் பயணம் மேற்கொண்டார் ராகுல்.

இதே ரயிலில் மாலையிலேயே அவர் தில்லி திரும்ப திட்டமிட்டுள்ளார்.

நன்றி: தினமணி.