மாநிலங்களவை எம்.பிக்கள் 100 பேர் கோடீஸ்வரர்கள்; ராகுல் பஜாஜ் முதலிடம்!

by மகி Mon Apr 12, 2010 2:20 am

மாநிலங்களவை உறுப்பினர்களில் 100 பேர் கோடீஸ்வரர்களாக திகழ்வதாகவும், அவர்களில் மிகப் பெரிய பணக்காரர் ராகுல் பஜாஜ் முதலிடத்தில் இருப்பதாகவும், அவருக்கு அடுத்தபடியாக தமிழகத்தைச் சேர்ந்த தொழிலதிபர் எம்.ஏ.எம். ராமசாமிக்கு இரண்டாவது இடத்தில் உள்ளதாகவும் தெரியவந்துள்ளது.

தேசிய தேர்தல் கண்காணிப்பகம் மற்றும் ஜனநாயக சீர்திருத்த கழகம் ஆகியவை இணைந்து தகவல் அறியும் உரிமைச் சட்டத்தின் மூலம் இந்த தகவல்களை பெற்று வெளியிட்டுள்ளன.

மாநிலங்களவை உறுப்பினர்களில் உறுப்பினர்களில் 100 பேருக்கு 1 கோடி ரூபாய்க்கு மேல் சொத்துக்கள் உள்ளன.

மாநிலங்களவை எம்.பி.க்களிலேயே மிகப் பெரிய கோடீஸ்வரர் மகாராஷ்ட்ராவைச் சேர்ந்த ராகுல் பஜாஜ்தான். இவரது அசையும், அசையா சொத்துக்களின் மதிப்பு ரூ.300 கோடி என தெரிவிக்கப்பட்டுள்ளது.

அவருக்கு அடுத்தபடியாக இரண்டாவது இடம், தமிழக தொழிலதிபர் எம்.ஏ.எம். ராமசாமிக்குக் கிடைத்துள்ளது. இவரது சொத்து மதிப்பு ரூ.278 கோடியாகும். இவர் கர்நாடகத்திலிருந்து மதச்சார்பற்ற ஜனதாதளம் சார்பில் மாநிலங்களவைக்கு தேர்ந்தெடுக்கப்பட்டவர் ஆவார்.

ஆந்திராவைச் சேர்ந்த காங்கிரஸ் எம்.பி. சுப்பராமி ரெட்டிக்கு ரூ. 272 கோடி, சமாஜ்வாடிக் கட்சியைச் சேர்நதவருமான ஜெயா பச்சனுக்கு ரூ. 215 கோடி, சமாஜ்வாடியிலிருந்து சமீபத்தில் நீக்கப்பட்ட அமர்சிங்குக்கு ரூ. 79 கோடி சொத்து உள்ளது.

தமிழகத்திலிருந்து தேர்ந்தெடுக்கப்பட்ட இந்திய கம்யூன்ஸ்ட் கட்சியின் தேசியச் செயலாளர் டி.ராஜா, மேற்கு வங்க மார்க்சிஸ்ட் கம்யூனிஸ்ட் எம்.பி. சமன் பதக் ஆகியோர் தங்களுக்கு சொத்து எதுவும் இல்லை என்று தெரிவித்துள்ளனர்.

கோடீஸ்வர எம்.பிக்கள் காங்கிரஸ் கட்சியில்தான் அதிகம் பேர் உள்ளனர். அக்கட்சியில் மொத்தம் 33 எம்.பிக்கள் கோடீஸவரர்கள் ஆவர். அதற்கு அடுத்தபடியாக பா.ஜனதாவில் 21 பேரும், சமாஜ்வாடிக் கட்சியில் 7 எம்.பிக்களும் கோடீஸ்வரர்களாக உள்ளனர்.

மேலும் மாநிலங்களவை எம்.பிக்களில் 37 பேர் மீது குற்றவியல் வழக்குகள் நிலுவையில் உள்ளன.

கிரிமினல் வழக்குப் பின்னணியைக் கொண்ட எம்.பிக்களை அதிகம் கொண்டிருப்பது காங்கிரஸ்தான். அங்கு 7 எம்.பிக்கள் மீது குற்ற வழக்குகள் நிலுவையில் உள்ளன.பா.ஜனதாவில் 6 பேரும், பகுஜன் சமாஜ் மற்றும சிவசேனாவில் தலா 4 பேரும் குற்றப் பின்னணி கொண்டவர்களாக உள்ளதாகவும் தெரிவிக்கப்பட்டுள்ளது.

நன்றி: வெப்துனியா.