டில்லி, இந்தூர், கான்பூர் அடுத்த இலக்கு : புனே பயங்கரத்தில் பாக்., ஆதரவு சக்திகள்

புதுடில்லி
:"புனேயை தொடர்ந்து டில்லி, இந்தூர் மற்றும் கான்பூர் நகரங்களில்
பயங்கரவாதிகள் தாக்குதல் நடத்தலாம்' என, உளவு நிறுவனங்கள்
எச்சரித்துள்ளதால், அந்நகரங்களில் உஷார் நிலை
அறிவிக்கப்பட்டுள்ளது.மேலும், நாடு முழுவதும் பாதுகாப்பு நடவடிக்கைகள்
மேம்படுத்தப்பட்டுள்ளன. அதே நேரத்தில், புனே குண்டு வெடிப்பில்,
பாகிஸ்தான் ஆதரவு பயங்கரவாத அமைப்புகளுக்கு தொடர்பு இருக்கலாம் என்ற
திடுக்கிடும் தகவலும் வெளியாகியுள்ளது.



மகாராஷ்டிர
மாநிலம் புனே, கோரேகான் பார்க் அருகேயுள்ள ஜெர்மன் பேக்கரியில் நேற்று
முன்தினம் நிகழ்ந்த குண்டுவெடிப்பில், ஒன்பது பேர் பலியாயினர்; 57 பேர்
காயம் அடைந்தனர். குண்டு வெடிப்பு நடந்த இடத்தை, மத்திய உள்துறை அமைச்சர்
சிதம்பரம் பார்வையிட்டார். இதன்பின் டில்லி திரும்பி அவர், உயர்மட்டக்
கூட்டம் ஒன்றை நடத்தினார்.தேசிய பாதுகாப்பு ஆலோசகர் சிவசங்கர மேனன்,
உள்துறை செயலர் ஜி.கே.பிள்ளை, ஐ.பி., மற்றும் "ரா' அமைப்பின் தலைவர்களான
ராஜிவ் மாத்தூர், வர்மா மற்றும் உயர் அதிகாரிகள் பங்கேற்றனர். இந்தக்
கூட்டத்தில், நாட்டின் பாதுகாப்பு நிலவரங்கள் பற்றி விவாதிக்கப்பட்டது.
பின், பிரதமர் மன்மோகன் சிங்கை சந்தித்த சிதம்பரம், அவரிடம் புனே குண்டு
வெடிப்பால் எழுந்துள்ள, பாதுகாப்பு நிலவரங்கள் பற்றி விவரித்தார்.


இதன் பின், மத்திய உள்துறை அமைச்சக அதிகாரிகள் கூறியதாவது:
பயங்கரவாதிகள் இப்போது புனேயில் தாக்குதல் நடத்தியுள்ளனர். இதைத்
தொடர்ந்து, டில்லி, கான்பூர் மற்றும் இந்தூரில் உள்ள பொது இடங்களில்
பயங்கரவாதிகள் தாக்குதல் நடத்தலாம் என, உளவு நிறுவனங்களுக்கு தகவல்
கிடைத்துள்ளது. இந்த விவரத்தை சம்பந்தப்பட்ட மாநில அரசுகளுக்கு தெரிவித்து
தேவையான நடவடிக்கை எடுக்கும்படி கேட்டுக் கொண்டுள்ளோம்.இதுமட்டுமின்றி,
அனைத்து மாநிலங்களுக்கும் ஒரு பொதுவான எச்சரிக்கை குறிப்பு
அனுப்பப்பட்டுள்ளது. அதில், ரயில் நிலையங்கள், பஸ் நிலையங்கள் மற்றும் இதர
பொது இடங்களிலும், மக்கள் கூடும் இடங்களிலும் தேவையான பாதுகாப்பு
நடவடிக்கைகளை மேற்கொள்ள வேண்டும் என, கேட்டுக் கொண்டுள்ளோம்.புனே குண்டு
வெடிப்பில் ஆர்.டி.எக்ஸ்., வெடிமருந்தை பயன்படுத்தியிருக்கலாம்.


இருந்தாலும்,
இதுபற்றி தடயவியல் நிபுணர்கள் ஆய்வு செய்து வருகின்றனர். புனே குண்டு
வெடிப்பு பற்றி மகாராஷ்டிர பயங்கரவாத எதிர்ப்புப் படையினர் விசாரணையை
துவக்கியுள்ளனர். அவர்கள் பல்வேறு கோணங்களில் விசாரிப்பர். பாக்., ஆதரவு
பயங்கரவாத அமைப்புகளுக்கு தொடர்பு இருக்கலாம் என்பதையும் மறுப்பதற்கு
இல்லை.சந்தேகத்திற்குரிய நபர்கள் மற்றும் அமைப்புகள் குறித்த அனைத்துவித
விசாரணைகளும் மேற்கொள்ளப்படும். புனேயில் குண்டு வெடிப்பு நிகழ்ந்த
இடத்திற்கு எதிரேயுள்ள ஐந்து நட்சத்திர ஓட்டலின் கண்காணிப்பு கேமராவில்
பதிவான காட்சிகளையும் பெற்று புலனாய்வு அதிகாரிகள் ஆய்வு செய்து
வருகின்றனர். ஜெர்மன் பேக்கரியில் கண்காணிப்பு கேமரா எதுவும் கிடையாது.


ஜமாயத்
- உல்-தாவா அமைப்பின் துணை தலைவர் அப்துல் ரகுமான் மாக்கி
சமீபத்தில்,பாக்., ஆதரவு காஷ்மீரில் உள்ள முரதாபாத்தில், அறிக்கை ஒன்றை
வெளியிட்டார். அதில், இந்தியாவில் மேலும் பல தாக்குதல்கள் நடத்தப்படும்
என, தெரிவித்திருந்தார். எனவே, அந்த அமைப்பிற்கு புனே குண்டு வெடிப்பில்
தொடர்பு உண்டா என்ற கோணத்திலும் விசாரிக்கப்படும். இந்திய முஜாகிதீன்
தொடர்பு இருக்கும் என்ற அடிப்படையிலும் விசாரணை நடக்கிறது.இவ்வாறு உள்துறை
அமைச்சக அதிகாரிகள் கூறினர்.


நேற்று மாலையில், புனேயின் போலீஸ் கமிஷனர் சத்யபால் கூறுகையில்,
" இந்த குண்டு வெடிப்பில் ஆர்.டி.எக்ஸ்., பயன்படுத்தப்பட்டதா என்பது
விரைவில் தெரியவரும். யாருடைய கைவரிசையில் இக்குண்டு வெடிப்பு நடந்தது
என்பதையும் ஓரிரு நாளில் விசாரித்து முடிவு செய்யப்படும்' என்றார்.மேலும்
அவர், இறந்தவர்களில் ஒருவர் ஈரான் நாட்டவர் என்றும் மற்றவர் இத்தாலி
நாட்டவர்' என்றும் குறிப்பிட்டார்.மத்திய அரசின் உஷார் நடவடிக்கையை
தொடர்ந்து, தலைநகர் டில்லியில் முக்கியத்துவம் வாய்ந்த இடங்களில்
பாதுகாப்பு அதிகரிக்கப்பட்டுள்ளது