பிரபாகரனின் மரண சான்றிதழை இலங்கை வழங்கவில்லை: சி.பி.ஐ.

''விடுதலைப்புலிகள் இயக்க தலைவர் பிரபாகரனின் மரண சான்றிதழை இலங்கை அரசு இதுவரை வழங்கவில்லை'' என்று ம‌த்‌திய புலனா‌ய்வு கழக இய‌க்குன‌ர் (சி.பி.ஐ.) தெரிவித்துள்ளார்.

இலங்கையில் கடந்த ஆண்டு மே மாதம் நடைபெற்ற இறுதிக்கட்ட போரின்போது விடுதலைப்புலிகள் இயக்கத் தலைவர் பிரபாகரன் கொல்லப்பட்டதாக இலங்கை அரசு அறிவித்தது.

முன்னாள் பிரதமர் ராஜீவ் காந்தி கொலை வழக்கில் பிரபாகரன் தேடப்படும் குற்றவாளி ஆவார். எனவே, இந்த வழக்கு விசாரணைக்காக, பிரபாகரனின் மரண சான்றிதழை அளிக்குமாறு இலங்கை அரசிடம் ம‌த்‌திய புலனா‌ய்வு கழக‌ம் கேட்டுக்கொண்டது.

சமீபத்தில், தகவல் பெறும் உரிமைச் சட்டத்தின் கீழ் கேட்கப்பட்ட ஒரு கேள்விக்கு பதில் அளித்த சி.பி.ஐ., பிரபாகரனின் மரண சான்றிதழை இலங்கை அரசு இன்னும் அனுப்பவில்லை என்று கூறியது. ஆனால், மத்திய உள்துறை அமை‌ச்ச‌ர் சிதம்பரமோ, பிரபாகரனின் மரண சான்றிதழை இலங்கை அரசு அனுப்பி விட்டதாக கூறினார்.

இந்நிலையில், பிரபாகரனின் மரண சான்றிதழை இலங்கை அரசு அளிக்கவில்லை என்று சி.பி.ஐ. இயக்குனர் அஸ்வினி குமார் கூறியுள்ளார்.

இது கு‌றி‌த்து அவ‌ர் கூறுகை‌யி‌ல், பிரபாகரனின் மரண சான்றிதழை அளிக்கும்படி இலங்கை அயலுறவு அமைச்சகத்திடம் சி.பி.ஐ. கோரியுள்ளது. விரைவில் அது கிடைக்கும் என்று எதிர்பார்க்கிறோம். ஆனால், இதுவரை எங்களுக்கு எந்த ஆவணமும் அளிக்கப்படவில்லை.

இலங்கை அரசு அளிக்கும் எந்தவொரு ஆவணத்தையும் ‌நீ‌திம‌ன்ற‌த்த‌ி‌ல் தாக்கல் செய்வோம். அதன்பிறகு வழக்கை முடித்துக்கொள்வது பற்றி ‌நீ‌திம‌ன்ற‌ம் இறுதி முடிவு எடுக்கும்.

ராஜீவ் கொலை வழக்கின் ஆயுள் தண்டனை கைதி நளினியின் விடுதலை விவகாரத்தில் தமிழக அரசுதான் இறுதி முடிவு எடுக்க வேண்டும். ஒருவேளை நளினி விடுதலை செய்யப்பட்ட பிறகு, அவரது நடமாட்டத்தை கண்காணிக்கும்படி ‌நீ‌‌திம‌ன்ற‌ம் அறிவுறுத்தினால், அதற்கான நடவடிக்கைகளை புலனாய்வு அமைப்புகள் மேற்கொள்ளும் எ‌ன்று அஸ்வினி குமார் கூறினார்.

ஆனா‌‌ல் கட‌ந்த ‌சில நா‌ட்களு‌க்கு மு‌ன்பு பிரபாகரனின் மரண சான்றிதழை இலங்கை அரசு வழ‌ங்‌கி‌வி‌ட்டதாக ம‌த்‌‌திய உ‌ள்துறை அமை‌ச்ச‌ர் ‌சித‌ம்பர‌ம் கூ‌றி‌யிரு‌ந்தா‌ர். த‌ற்போது ‌பிரபாகர‌னி‌ன் மரண சா‌ன்‌றித‌ழ் இ‌ன்னு‌ம் எ‌ங்களு‌க்கு ‌கிடை‌க்க‌வி‌ல்லை எ‌ன்று சி.பி.ஐ. இயக்குனர் அஸ்வினி குமார் கூ‌றியு‌ள்ளா‌ர். இ‌ந்த விவகாரத்தில் த‌ற்போது குழப்பம் ‌விளை‌வி‌ப்பது யா‌ர் எ‌ன்று தெ‌ரிய‌வி‌ல்லை.

நன்றி: வெப்துனியா.