முதல் ஒருநாள்: ஆஸ்திரேலியாவிடம் போராடித் தோற்றது இந்தியா!

ஆஸ்திரேலியாவுக்கு எதிரான முதல் ஒருநாள் கிரிக்கெட் போட்டியில் இந்திய அணி 4 ரன்கள் வித்தியாசத்தில் போராடித் தோல்வியுற்றது.

இந்திய-ஆஸ்திரேலிய அணிகளுக்கு இடையிலான 7 போட்டிகள் கொண்ட ஹீரோ ஹோண்டா ஒருநாள் கிரிக்கெட் தொடர் வதோதராவில் நேற்று துவங்கியது. இப்போட்டியில் பூவா-தலையா வென்ற பாண்டிங் பேட்டிங்கைத் தேர்வு செய்தார்.

துவக்க வீரர் பெய்ன், ரிக்கி பாண்டிங், ஒய்ட், மைக்கேல் ஹஸ்ஸி ஆகியோரது சிறப்பான பங்களிப்பால் ஆஸ்ட்ரேலிய அணி 50 ஓவர்களில் 8 விக்கெட் இழப்புக்கு 292 ரன்கள் எடுத்தது.

வெற்றி பெற 293 ரன்கள் தேவை என்ற இமாலய இலக்குடன் களமிறங்கிய இந்திய அணி துவக்கத்தில் சறுக்கினாலும், நடுக்கள வீரர்களின் நிதான ஆட்டத்தால் ஓரளவு நிமிர்ந்தது.

ஆட்டத்தின் 34வது ஓவரில் 3 விக்கெட் இழப்புக்கு 167 ரன்கள் என்ற வலுவான நிலையில் இருந்த இந்திய அணி, 201 ரன்கள் சேர்ப்பதற்குள் 7 விக்கெட்டுகளை இழந்து தவித்தது. இனி இந்தியாவுக்கு நிச்சய தோல்வி என ரசிகர்கள் துவண்டுவிட்ட நிலையில் இணைந்த ஹர்பஜன்-பிரவீன்குமார் ஜோடி தங்களின் அதிரடி ஆட்டதால் ஆஸி. பந்துவீச்சாளர்களுக்கு ‘தண்ணி’ காட்டினர்.

குறிப்பாக ஹர்பஜனின் ஆட்டத்தில் அனல் பறந்தது. அவர் 31 பந்துகளில் (3 சிக்ஸர், 4 பவுண்டரி) 49 ரன் குவித்து எதிர்பாராத நேரத்தில் ஆட்டமிழந்தார். மறுமுனையில் பிரவீன்குமார் 32 பந்துகளில் 40 ரன்கள் (5 பவுண்டரி, ஒரு சிக்ஸர்) எடுத்து இறுதிவரை ஆட்டமிழக்காமல் இருந்தார்.

ஹர்பஜன்-பிரவீன்குமார் இணையின் அதிரடியால் வெற்றி இலக்கை நோக்கி ராக்கெட் வேகத்தில் முன்னேறிய இந்திய அணி, இறுதி ஓவரில் ஹர்பஜன் ஆட்டமிழந்ததால் 4 ரன்கள் வித்தியாசத்தில் தோல்வியைத் தழுவியது. நிர்ணயிக்கப்பட்ட 50 ஓவர்கள் முடிவில் 8 விக்கெட் இழப்புக்கு 288 ரன்களை மட்டுமே இந்தியா எடுத்தது.

ஆட்டத்தின் முக்கியமான கட்டத்தில் ரெய்னா, ரவீந்திர ஜடேஜா இருவரும் அடுத்தடுத்து ஒற்றை இலக்க ரன்களில் ஆட்டமிழந்து வெளியேறியது, இந்திய அணியின் தோல்விக்கு முக்கிய காரணம் என்பதை மறுக்க முடியாது.

ஆஸ்திரேலிய தரப்பில் ஷேன் வாட்ஸன், மிட்செல் ஜான்சன் தலா 2 விக்கெட்டுகளும், பிரெட் லீ, பீட்டர் சிடில், வோகஸ், ஹவ்ரிட்ஸ் தலா ஒரு விக்கெட்டும் கைப்பற்றினர்.

நன்றி: வெப்துனியா.