ஆகமம் – தமிழ் முனிவர்கள் மூலம் இறைவனால் வெளிப்படுத்தப்பட்டது

ஆகமம் இறைவனை அடையச் செய்யும் நூல் என்பது மட்டுமன்று. அது இறைவனாலேயே வெளிப்படுத்தப்பட்டது எனத் தமிழ்ச்ச்சான்றோர்கள் கூறியிருக்கின்றனர்.

குறிப்பாக, ஆகமத்தை இறைவன் வெளிப்படுத்தினார் என்பதை மணிவாசகர் மிகத் தெளிவாக எடுத்துக் கூறியிருப்பது இங்கே நினைக்கத் தக்கது.
“மன்னு மாமலை மகேந்திர மதனில்
சொன்ன ஆகமம் தோற்றுவித் தருளியும்”
என்பன திருவாசக வரிகள்.

சிவபெருமான் என்று கூறப்படும் இறைவனாலேயே ஆகமம் தோற்றுவிக்கப்பட்டது என்று, மணிவாசகர் போன்ற அருளாளர்கள் கூறி இருப்பது மிக வலியச் சான்று. அதோடு, மணிவாசகர் திருவாசகத்தை மொழிய, சிவபெருமானே வந்து எழுதி எடுத்துக் கொண்டான் என்பது மணிவாசகர் வரலாறு. எனவே, மணிவாசகரின் இந்த வரிகளும் இறைவனால் எழுதப் பெற்றவை ஆகின்றன. எனவே, இவ்வரியில் கூறப்படும் பொருள் மேலும் ஆணித்தரமாக உறுதி ஆகிறது.

அத்துடன், சைவத் திருமுறைகளில் ஆலநிழற்கீழ் அமர்ந்து இறைவன் சில தமிழ் முனிவர்களுக்கு, அறம், பொருள், இன்பம், வீடு என்ற நான்கையும் என்று பல இடங்களில் கூறப்படுகின்றன. அவற்றை விரிப்பின் பெருகும்.

இதுகாறும் கூறியவற்றால் 3 உண்மைகள் உறுதி ஆகின்றன.
1. இறைவன்தான் ஆகமத்தைச் சொன்னான்
2. இறைவன் ஆகமத்தைச் சொன்னது மகேந்திர மலையில்
3. இறைவன் ஆகமத்தைத் தமிழ் முனிவர்களுக்கு ஆலநிழல் அமர்ந்து உணர்த்தினான்
தமிழர் வணங்கும் சிவனுக்கு ஆலமர்செல்வன் என்று வழங்கப்படும் சொல்லும் இதை உறுதிப்படுத்துகிறது. ஆக இறைவன் சொன்னது தான் ஆகமம் என்பதில் ஐயம் எழ வாய்ப்பில்லை.

தொடரும்
(நன்றி: சிவனியமும் சால்பியமும் நூல்)