இன்று உலக புகைப்பட தினம் august 19th

by **B.G.துர்கா தேவி** Fri Aug 19, 2011 10:21 am

இன்று உலக புகைப்பட தினம்

முதல் புகைப்படம் பதிவு செய்யப்பட்டு 196 ஆண்டுகள் நிறைவடைந்திருக்கிறது. பாக்ஸ் வடிவில் கண்டுபிடிக்கப்பட்ட கேமரா, தற்போது டிஜிட்டலுக்கு மாறியிருக்கிறது. இதில், புகைப்படச்சுருள் பயன்படுத்திய கேமராக்கள் இன்று ஏறக்குறைய முற்றிலும் பயன்பாட்டிலிருந்து மறைந்துவிட்டன. சிறிய வகை டிஜிட்டல் கேமரா முதல் தொழில்நுட்ப வல்லுநர்கள் பயன்படுத்தும் கேமராக்கள் வரை எத்தனையோ வகை.

புகைப்படம் எடுப்பது என்பது இன்றைய சூழலில் மிகச் சாதாரணமாக மாறிவிட்டிருக்கிறது. புகைப்படம் எடுப்பதே அரிதான செயலாக இருந்த காலம் மாறி, அனைவருமே இன்றைக்கு எளிதில் பயன்படுத்தும் தொழில்நுட்பமாக மாறியிருக்கிறது. முந்தைய கேமராக்களில் கை அசைவுகள் கூட, படத்தின் பதிவைக் குலைத்துவிடும். ஆனால் இன்று, கேமரா லென்ஸ் தொழில்நுட்பம் காரணமாக மிகக் குறைந்த வெளிச்சத்தில் கூட நல்ல படத்தைப் பதிவு செய்ய முடியும்.

முன்பு 6 அடி தொலைவுக்கு அப்பால் படம் எடுத்தால், படம் சரியாகப் பதிவாகாது. இன்றைக்கு "தொலைவு' என்பதே தொலைந்துபோனது.

வயது முதிர்ந்த, கை நடுங்கும் மூதாட்டி கூட தங்களது பேரக் குழந்தைகளை இன்றைய கேமராவில் பதிவு செய்ய முடியும்.

20ம் நூற்றாண்டில் எடுக்கப்பட்ட சில புகைப்படங்கள் உலக வரலாற்றை மாற்றியுள்ளன. உதாரணமாக, சீனவீரர்களின் ராணுவ பீரங்கியை எதிர்த்து நின்ற "டேங்க் மேன்', வியட்நாம் போரை நிறுத்த காரணமாக இருந்த சிறுமியின் புகைப்படம், 1994ம் ஆண்டு, சூடானில் நிலவிய உணவுப் பஞ்சத்தை எடுத்துரைத்த குழந்தையின் போட்டோ ஆகியவற்றை சொல்லலாம்.

"ப்ரீ டூ தி வேர்ல்டு': 19ம் நூற்றாண்டின் துவக்கத்தில், லூயிஸ் டாகுரே என்பவர், "டாகுரியோடைப்' எனப்படும் புகைப்படத்தின் செயல்பாட்டு முறையை வடிவமைத்தார். 1839ம் ஆண்டு ஜனவரி 9ம் தேதி பிரான்ஸ் அகாடமி ஆப் சயன்ஸ், இம்முறைக்கு ஒப்புதல் அளித்தது. ஆகஸ்ட் 19ம் தேதி , பிரான்ஸ் நாட்டு அரசு "டாகுரியோடைப்' செயல்பாடுகளை ""ப்ரீ டூ தி வேர்ல்டு'' என உலகம் முழுவதும் அறிவித்தது. இதை எடுத்துரைக்கும் வகையில் இன்றைய தினம் உலக புகைப்பட தினமாக கொண்டாடப்படுகிறது.

முதல் புகைப்படம்: 1826ம் ஆண்டு பிரான்ஸ் நாட்டை சேர்ந்த ஜோசப் நைஸ்போர் நீப்ஸ் என்பவர் முதல் நிலையான நவீன புகைப்படத்தை எடுத்தார். இந்த புகைப்படம் நாளடைவில் அழிந்தது. இதன் பின், 1839ம் ஆண்டு லூயிஸ் டாகுரே, பாரிசில் உள்ள ஒரு தெருவை புகைப்படமாக எடுத்தார். தனிநபர் எடுத்த முதல் புகைப்படம் இது.

புகைப்பட விருதுகள்: சிறந்த புகைப்படங்களுக்கு ஆண்டு தோறும் பல்வேறு அமைப்புகளால் விருதுகள் வழங்கப்படுகின்றன. பத்திரிக்கை துறையில் சிறந்த புகைப்படங்களுக்கு "வேர்ல்டு பிரஸ் போட்டோ' ,"டைம்' இதழ் மற்றும் புலிட்சர் விருதுகள் வழங்கப்படுகின்றன.

பிரமிக்க வைக்கும் தொழில்நுட்பம்: பெரிய பெட்டி வடிவில் கண்டுபிடிக்கப்பட்ட கேமரா, கையடக்க டிஜிட்டல் கேமராவாக உருமாறியிருக்கிறது. புகைப்படம் எடுக்கும் போது, 6 அடி தொலைவுக்கு பின் நிற்கக்கூடாது, இரவு நேரங்களில் உருவம் தெரியாது, படம் எடுக்கும் போது அசையாமல் நிற்க வேண்டும், மின்விளக்குகள் கட்டாயம் பயன்படுத்த வேண்டும் என்று பல கட்டுப்பாடுகள் இருந்தன. ஆனால், இன்று புகைப்படம் எடுப்பது என்பது மிகவும் சாதாரணம் என்ற நிலை வந்து விட்டது. கைநடுங்கும் வயதானவர்களிடம் கேமராவை கொடுத்தால் கூட, தெளிவான புகைப்படங்களை எடுக்கும் வகையில் தொழில்நுட்பம் வளர்ந்து விட்டது. பிலிம் ரோல்கள் வாங்கி புகைப்படம் எடுத்த காலம் மாறி, எவ்வித செலவும் இல்லாமல், கையில் உள்ள மொபைல் போன்களில் எளிதாக படம் எடுக்கும் வகையில் இக்கலை பரவலாகிவிட்டது.