முத்தரப்பு கிரிக்கெட் போ‌ட்டி: ‌ஜி‌ம்பா‌ப்வேயை ‌வீ‌ழ்‌த்‌தி இலங்கை சாம்பியன்!

முத்தரப்பு கிரிக்கெட் இறுதிப்போட்டியில் இலங்கை அணி, ஜிம்பாப்வேயை சுலபமாக வீழ்த்தி சாம்பியன் பட்டத்தை வென்றது.

மூன்று நாடுகள் பங்கேற்ற ஒரு நாள் கிரிக்கெட் போட்டித் தொட‌‌ரி‌ல் இலங்கை - ஜிம்பாப்வே மோதிய இறுதி ஆட்டம் ஹராரே நகரில் நேற்று நடந்தது. பூவா தலையா வெ‌ன்ற இலங்கை அணி முதலில் ஜிம்பாப்வேயை பேட் செய்ய பணித்தது. இதன்படி பேட்டிங்கை தொடங்கிய ஜிம்பாப்வே அணிக்கு தொடக்கம் சரியாக அமையவில்லை. இலங்கை அணியின் பந்து வீச்சு தாக்குதலில் ஜிம்பாப்வே பேட்ஸ்மேன்கள் மிரண்டனர்.

முந்தைய ஆட்டத்தில் சதம் அடித்த பிரன்டன் டெய்லர் 19 ரன்களில் கேட்ச் ஆனார். முன்னதாக மற்றொரு தொடக்க ஆட்டக்காரர் மசகட்ஸா 4 ரன்களில் ஆட்டம் இழந்தார். இவர்களுக்கு பிறகு இறங்கிய எர்வின் 9 ரன்களில் ரன் அவுட் ஆனார். மோசமான தொடக்கத்தால், ஜிம்பாப்வேயின் ரன்ரேட்டும் ஒரேடியாக சரிந்தது.

இதன் பின்னர் தைபு அணியை சரிவில் இருந்து மீட்க போராடினார். ஓரளவு அணியை நல்ல நிலைக்கு கொண்டு வந்தார். ஆனால் அவர் 71 ரன்களில் வீழ்ந்ததும், மீண்டும் ஜிம்பாப்வேயின் விக்கெட்டுகள் சீர்குலைந்தன. தைபு (37), கிரேக் லாம்ப் (37) தவிர மற்ற எந்த பேட்ஸ்மேன்களையும் இலங்கை பவுலர்கள் தாக்குப்பிடிக்கவிடவில்லை. முடிவில் ஜிம்பாப்வே அணி 49 ஓவர்களில் 199 ரன்களு‌‌க்கு அனை‌த்து ‌வி‌க்கெ‌ட்டுகளையு‌‌ம் இழ‌ந்தது. இலங்கை தரப்பில் பெர்னாண்டோ 3 விக்கெட்டுகளும், அஜந்தா மென்டிஸ், ஜீவன் மென்டிஸ் தலா 2 விக்கெட்டுகளும் கைப்பற்றினர்.

அடுத்து ஆடிய இலங்கை அணி 34.4 ஓவர்களில் ஒரு விக்கெட்டுக்கு 203 ரன்கள் விளாசி 9 விக்கெட்டுகள் வித்தியாசத்தில் வெற்றியை ருசித்து, கோப்பையை கைப்பற்றியது. தொடக்க ஆட்டக்காரர்கள் தரங்காவும், தில்ஷனும் முதல் விக்கெட்டுக்கு 160 ரன்கள் குவித்து வலுவான அடித்தளம் அமைத்து கொடுத்தது, இலங்கையின் வெற்றியை எளிதாக்கியது.

தரங்கா 72 ரன்களில் ரன் அவுட் ஆனார். தில்ஷன் 108 ரன்களுடன் கடைசி வரை களத்தில் இருந்தார். தனது 7வது சதத்தை நிறைவு செய்த அவருக்கு ஆட்டநாயகன் விருது கிடைத்தது. ஜிம்பாப்வே வீரர் பிரன்டன் டெய்லர் தொடர்நாயகன் விருதினை பெற்றார்.

லீக் சுற்றில் நடந்த 6 ஆட்டங்களிலும் 2வது பேட் செய்த அணிகளே வெற்றி பெற்றிருந்தன. இறுதிப்போட்டியிலும் அதே நிலையே தொடர்ந்திருக்கிறது.

அடுத்து இந்தியா-ஜிம்பாப்வே இடையே இரண்டு 20 ஓவர் போட்டிகள் முறையே வரு‌ம் 12, 13 தேதிகளில் நடக்கிறது.

நன்றி: வெப்துனியா.