பலம் தரும் பழம் தர்பூசணி!

வெயில் காலத்தில் வேகவைத்த உணவுகளை உண்பதைவிட, நீர்ச்சத்து நிறைந்த பழங்களை உண்பதுதான் பலருக்கும் பிடித்தமான விஷயம். வெயிலில் நாம் அலைவதால் உடலில் உள்ள நீர்ச்சத்து வியர்வை மூலமாக வெளியேறுவதுடன் உடலுக்கு தேவையான அத்தியாவசிய உப்புகள் ரத்தத்தில் குறைகின்றன. அதிக ரத்த அழுத்தம் போன்ற காரணங்களால் மாத்திரை உட்கொள்பவர்கள், உப்பில்லாமல் உணவு உண்பவர்களுக்கும் கோடையில் ரத்த அழுத்தம் குறைய வாய்ப்புண்டு. இதனால் ரத்த அழுத்தம் குறைந்து, திடீரென மயக்கம் ஏற்பட்டு உணர்விழப்பு உண்டாகும். அதுமட்டுமின்றி வியர்வை துவாரங்களும், கொழுப்பு கோளங்களும் அதிகம் செயல்படுவதால் உடலின் சக்தி பரிமாற்றம் அதிகரித்து உடலுக்கு கூடுதல் கலோரி சக்தி தேவைப்படுகிறது.

உடலின் வியர்வை வெளியேறும்பொழுது சவ்வூடு பரவுதல், தந்துகி கவர்ச்சி போன்றவற்றின் மூலமாக நீர்ச்சத்து அங்குமிங்கும் ஓடுவதால் உடலின் வெப்பநிலை திடீரென உயர்ந்தும், திடீரென தாழ்ந்தும் ஒருவித அனலை உடலில் ஏற்படுத்துகிறது. உடலின் வியர்வையை தணிக்கவும், குளிர்ச்சியை உண்டாக்கவும் நாம் பயன்படுத்தும் மின்சாதனங்களால் உடலின் வெப்பநிலை மற்றும் உள்சூடு அதிகரிக்கிறது. இதனை தவிர்க்க காற்றோட்டமான இடத்தில் இளைப்பாறுதல் நல்லது.

வேனற்கட்டிகள்: கோடையின் கொடுமையை தணிக்க பலவகையான திரவங்களை நாடுகிறோம். வேதிப்பொருட்களால் செய்யப்பட்ட திரவங்களை உட்கொள்வதால் பற்சொத்தை முதல் சிறுநீரக கற்கள் வரை பல உபாதைகள் ஏற்படுகின்றன. ஐஸ்கிரீம் போன்ற பொருட்களை உட்கொள்வதால் கொழுப்புச்சத்து அதிகரித்து, தோலில் சிறு, சிறு கட்டிகளும் தோன்றி, அவை உடைந்து வேனற்கட்டிகளாக மாறுகின்றன. செயற்கையான திரவ உணவுகளை உட்கொண்டு உடலை கெடுத்துக்கொள்வதைவிட வெயில் காலத்தில் பழங்களை உட்கொள்வது கூடுதல் பலனைத்தருகின்றன. தரமான பழங்கள் விலை கூடுதலாக இருப்பதால் அனைத்து தரப்பினராலும் பயன்படுத்த இயலாமல் உள்ளது. ஆகவே மலிவாக கிடைக்கும் தரமான பழமான தர்பூசணி பழங்களை அதிகம் உட்கொள்ளலாம்.

'சிட்ருல்லஸ் வல்காரிஸ்' என்ற தாவரவியல் பெயர்கொண்ட 'குக்கர்பிட்டேசியே' என்ற குடும்பத்தைச் சார்ந்த கொடியில் விளையும் பழங்களே தர்பூசணிப்பழம், தண்ணீர்பழம், வாட்டர்மெலான் என்ற பெயர்களில் அழைக்கப்படுகின்றன. இவை கோடைகாலத்தில் பெருமளவு விளைகின்றன. வெளித்தோலை ஒட்டி இளம்பச்சை நிறத்திலும், மையப்பகுதியில் சிவப்பு நிற இனிப்பான சர்க்கரை அங்ககப்பொருள், பெக்டின் மற்றும் கரோட்டினாய்டுகளை கொண்டுள்ள இவற்றின், சதைப்பகுதிகள் தனியாகவும், பழச்சாறாகவும் உட்கொள்ளப்படுகின்றன. பழச்சாற்றிலுள்ள சிட்ருலின், ஆர்ஜினின் ஆகியன கல்லீரலில் யூரியாவின் உற்பத்தியை அதிக படுத்தி, சிறுநீரைப் பெருக்கி, உடலுக்கு போதுமான சக்தியை தருகின்றன.

சோர்வு நீங்கும்: கோடைகாலத்தில் நீரிழப் பினால் தோன்றும் பலம் குறைதலை தடுக்க, தர்பூசணித்துண்டுகளை விதை, மேற்தோல் மற்றும் கடினப்பகுதியை நீக்கி, மிக்சியில் போட்டு அரைத்து, வடிகட்டி எடுத்துக்கொள்ளவேண்டும். அதுபோல் எலுமிச்சம்பழம் அல்லது ஆரஞ்சு பழத்தை பிழிந்து சாறு எடுத்துக்கொள்ள வேண்டும். தர்பூசணிப்பழச்சாறு 200 மிலி, எலுமிச்சம் பழச்சாறு 50 மிலி ஆகியவற்றை ஒன்றாக கலந்து, அத்துடன் சீனிக்கு பதில் தேன் அல்லது நாட்டுச்சர்க்கரை சேர்த்து அருந்திவர நீர்ச்சத்து அதிகரித்து, பலம் உண்டாகும். சோர்வு நீங்கும்.

நன்றி: தினமலர்.