மாணவர்களுக்கு இலவச சைக்கிள் வழங்கும் திட்ட‌ம்: கருணாநிதி தொடங்கி வைத்தார்!

136 கோடியே 42 இலட்சம் ரூபா‌ய் செலவில் 11 ஆம் வகுப்பில் பயிலும் 5 இலட்சத்து 58 ஆயிரத்து 867 மாணவ, மாணவியர்க்கு இலவச சை‌க்‌கி‌ள்க‌ள் வழங்கும் திட்ட‌த்தை முதலமைச்சர் கருணா‌நி‌தி இ‌ன்று தொடங்கி வைத்தார்.

தமிழகத்திலுள்ள அரசு, அரசு உதவிபெறும், அரசின் ஒரு பகுதி உதவிபெறும் மேல்நிலைப் பள்ளிகளில் 11 ஆம் வகுப்பில் பயிலும் ஆதிதிராவிட, பிற்படுத்தப்பட்ட, மிகவும் பிற்படுத்தப்பட்ட மற்றும் சீர் மரபினர் உள்ளிட்ட அனைத்து சமுதாயங்களையும் சார்ந்த மாணவ- மாணவியர் அனைவருக்கும் இலவச சை‌க்‌கி‌ள்கள் வழங்கும் திட்டத்தின்கீ‌ழ் நடப்பு 2009-2010ஆம் ஆண்டில், 2 இலட்சத்து 50 ஆயிரத்து 236 மாணவர்களுக்கும், 3 இலட்சத்து 8 ஆயிரத்து 631 மாணவிகளுக்கும் ஆக மொத்தம் 5 இலட்சத்து 58 ஆயிரத்து 867 மாணவ- மாணவியர்க்கு 136 கோடியே 42 இலட்ச ரூபா‌ய் செலவில் இலவச சை‌க்‌கி‌ள்களை வழங்கிட முதலமைச்சர் கருணா‌நி‌தித ஏற்கனவே ஆணையிட்டிருந்தார்.

அந்த ஆணையின்படி, மாணவர்களுக்கான ஒரு சை‌க்‌கி‌ள் 2475 ரூபா‌ய் விலையிலும், மாணவியர்களுக்கான ஒரு சை‌க்‌கி‌ள் 2370 ரூபா‌ய் விலையிலும் மொத்தம் 136 கோடியே 42 இலட்ச ரூபா‌ய் செலவில் கொள்முதல் செ‌ய்யப்பட்டுள்ளன.

செ‌ன்னை தலைமைச் செயலகத்தில் இ‌ன்று நடைபெற்ற விழாவில் முதலமைச்சர் கருணா‌நி‌தி 6 மாணவர்களுக்கும், 6 மாணவிகளுக்கும் இலவச சை‌க்‌கி‌ள்களை வழங்கி வா‌ழ்‌த்து‌க்கள் கூறி தமிழகம் முழுவதிலும் சை‌க்‌கி‌‌ள்கள் வழங்கும் திட்டத்தைத் தொடங்கி வைத்தார்.

இந்‌நிக‌ழ்‌வி‌ன் போது, அமை‌ச்ச‌ர்க‌ள் ஆ‌ற்காடு வீராசாமி, கே.கே.எஸ்.எஸ்.ஆர்.இராமச்சந்திரன், பொங்கலூர் பழனிச்சாமி, தங்கம் தென்னரசு, தமிழரசி, தலைமைச் செயலர் கே.எஸ்.ஸ்ரீபதி, ஆதிதிராவிடர் நலத்துறை செயலர் விஸ்வநாத் ஷெகாங்கர், பிற்படுத்தப்பட்டோர் நலத்துறை செயலர் டி.என். இராமநாதன், ஆதிதிராவிடர் நல ஆணையர் சிவசங்கரன், பிற்படுத்தப்பட்டோர் நல ஆணையர் குமார் ஜெயந்த், மிகவும் பிற்படுத்தப்பட்டோர் நல ஆணையர் அண்ணாமலை ஆகியோர் உடனிருந்தனர்.

நன்றி: வெப்துனியா.