விரைவில் செல்போன்களுக்கு 11 இலக்க எண்கள்!

by மகி Tue Apr 06, 2010 12:18 am

இன்னும் சில ஆண்டுகளில் இந்தியா வில் மட்டும் செல்போன் பயன்படுத்துவோர் எண்ணிக்கை 100 கோடியைத் தாண்டப் போகிறது. எனவே நம்பர் பற்றாக்குறையைச் சமாளிக்க 11 இலக்க எண்களை அறிமுகப்படுத்த முடிவு செய்துள்ளது ட்ராய் எனப்படும் தொலைத்தொடர்பு ஒழுங்குமுறை ஆணையம்.

தற்போது இந்தியாவில் 10 இலக்க எண்கள் செல்போன்களுக்கு வழங்கப்பட்டுள்ளன. 100 கோடி இணைப்புகள் வரை இந்த 10 இலக்க எண்களைப் பயன்படுத்தலாம். ஆனால் இப்போதுள்ள வளர்ச்சி வேகத்தைக் கணக்கிட்டால் 2014ஆம் ஆண்டில் இந்தியாவில் 100 கோடி பேர் கையில் செல்போன்கள் இருக்கும் என்று எதிர்பார்க்கப்படுகிறது.

எனவே இப்பொழுதைய 10 இலக்க செல்போன் எண்களை 11 இலக்கமாக மாற்ற ட்ராய் அனைத்து செல்போன் நிறுவனங்களுக்கும் ஆலோசனை தெரிவித்துள்ளது.

ஆனால் இன்னமும் செல்போன் சேவை வழங்கும் நிறுவனங்கள் இதுகுறித்த ஒருமித்த கருத்துக்கு வரவில்லை. காரணம் 11 இலக்க எண்களுக்கு சற்று கூடுதல் செலவாகும் என்பதே.

ஆனாலும் 11 இலக்க எண்கள் கட்டாயம் என்பதால் விரைவில் அனைத்து நிறுவனங்களும் இதற்கு ஒப்புதல் தந்தே தீர வேண்டிய சூழல் உருவாகியுள்ளது.

நன்றி: தட்ஸ்தமிழ்.