இந்தியா இன்னிங்ஸ் வெற்றி! ஐ.சி.சி. டெஸ்ட் தரவரிசையில் முதலிடம் பிடித்தது!

மும்பையில் நடைபெற்ற இலங்கைக்கு எதிரான மூன்றாவது, இறுதி டெஸ்டில் இந்தியா ஒரு இன்னிங்ஸ் மற்றும் 24 ரன்களில் வெற்றி பெற்றது. ஜாகீர் கான் 5 விக்கெட்டுகளை வீழ்த்தினார். இந்த வெற்றி மூலம் 18 மாதகால கனவு நிறைவேறியது. அதாவது ஐ.சி.சி. டெஸ்ட் தரவரிசையில் இந்தியா முதன் முறையாக முதலிடத்தை பிடித்து வரலாறு படைத்தது.

இலங்கை 309 ரன்களுக்கு சுருண்டது. 36 ஆண்டுகளுக்கு பிறகு டெஸ்ட் போட்டி காணும் பிரபோர்ண்ன் மைதானத்தில் வெற்றி பெற்று டெஸ்ட் தரவரிசையில் முதலிடம் பிடித்துள்ளது. தொடரை இந்தியா 2- 0என்று கைப்பற்றியது.

சங்கக்காராவிற்கு அபாரமாக ஜாகீர் கான் வீசிய பந்து மட்டையை லேசாக தட்டிச் செல்ல 137 ரன்களில் ஆட்டமிழந்தார். ஹெராத்திற்கு பவுன்சர் வீசினார் ஜாகீர் அவர் அதனை ஆட முயல ஓஜா அதனை டைவ் அடித்து பிடித்தார்.

முரளி களமிறங்கி அபாரமாக 3 பவுண்டரிகளை அடித்தார். ஆனால் அடுத்த ஓவரில் ஜாகீர் கான், நுவான் குலசேகராவை அபார பந்து மூலம் லக்ஷ்மண் கேட்சிற்கு வீழ்த்தினார்.

வரலாற்று முக்கியத்துவம் வாய்ந்த கடைசி விக்கெட்டை ஹர்பஜன் வீழ்த்தினார். முரளிதரன், தோனியிடம் கேட்ச் கொடுத்து ஆட்டமிழக்க இந்தியா இலங்கையை வீழ்த்தி முதல் முறையாக ஐ.சி.சி. டெஸ்ட் தரவரிசையில் முதலிடம் பிடித்தது.

மற்ற இந்திய அணிகள் செய்ய முடியாததை இந்த 18மாதகால கடின் உழைப்பின் மூலம் தோனி தலைமை இந்திய அணி அடைந்துள்ளது.

விரேந்திர ஸெவாகின் அந்த அதிரடி, அனாயாச மட்டை சுழற்றல் மூலம் அடித்து நொறுக்கிய 293 ரன்களால்தான் இந்த வெற்றியை ஈட்ட முடிந்தது. அவர் அவ்வளவு வேகமாக ரன்களை குவிக்கவில்லையெனில் ஆட்டம் டிராவாக வாய்ப்பிருந்திருக்கும், இந்தியாவின் நம்பர் ஒன் கனவு தகர்ந்திருக்கும். எனவே சேவாகின் ஆட்டம் மிகவும் முக்கியத்துவம் வாய்ந்தது.

வெற்றி பெற்றவுடன் சச்சின் டென்டுலர்கர், ரவி சாஸ்திரியுடன் பேசுகையில், "டெஸ்ட் தரவரிசையில் முதலிடம் என்ற கனவு உண்மையானது, இதற்காகத்தான் நான் என் கிரிக்கெட் வாழ்நாளில் காத்திருந்தேன், நான் மட்டுமல்ல இந்த நாடே பெருமைப்படக்கூடிய ஒரு தருணம் இது. கேரி, கர்ஸ்டன், அப்டன், ராபின்சிங், பிரசாத், ஆகியோரும் அபாரமான அணியை உருவாக்க பாடுபட்டனர். எல்லா வீரர்களும் கடந்த 18 மாதங்களாக இந்த நிலையை எட்ட கடுமையாக போராடினோம். முதல் பேட்ஸ்மெனிலிருந்து எம்.எஸ்.தோனி வரை அபாரமான பேட்டிங் வரிசையை நாம் கொண்டிருக்கிறோம்." என்று மட்டற்ற மகிழ்ச்சியில் பேசினார்.

ஜாகீர் கான் 21 ஓவர்கள் வீசி 5 மைடன்களுடன் 72 ரன்கள் கொடுத்து 5 விக்கெட்டுகளைக் கைப்பற்றினார். ஓஜா, ஹர்பஜன்சிங் தலா இரண்டு விக்கெட்டுகளைக் கைப்பற்ற ஸ்ரீசாந்த் ஒரு விக்கெட்டைக் கைப்பற்றினார்.

அபாரமாக விளையாடி டெஸ்டை வெற்றிக்கு இட்டுச் சென்ற விரேந்திர சேவாக் ஆட்ட நாயகனாகவும், இந்த தொடரில் 2 சதங்கள் ஒரு அரைசதம் ஆகியவற்றுடன் 122 ரன்கள் சராசரியில் 491 ரன்கள் குவித்து தொடர் நாயகன் விருதையும் தட்டிச் சென்றார்.

விருதைப் பெற்ற சேவாக், கேரி கர்ஸ்டனுக்கு நன்றி தெரிவித்தார். தான் பவுண்டரி அடிக்க வேண்டிய பந்துஅகளைத்தான் அடிக்கிறேன், ஆனால் ஓய்வறையில் நண்பர்கள் என்னிடம் நல்ல பந்துகளையும் பவுண்டரி அடிப்பதாக கூறுகிறார்கள். ஆனால் என்னுடைய ஆட்ட முறைகளின் படி நான் பவுன்டரி பந்துகளைத்தான் பவுண்டரி அடிக்கிறேன் என்று கூறினார்.

சங்கக்காரா பேசுகையில், முதலிடத்திற்கு வர அனைத்துத் தகுதிகளையும் இந்திய அணி பெற்றுள்ளது. என்றார்.

தோனி அணியின் வீரர்கள் அனைவருக்கும் இந்த சாதனை சொந்தமானது என்றார்.

நன்றி: வெப்துனியா.