ஐ.சி.ஐ.சி.ஐ., வங்கியில் பணிவாய்ப்புகள்!

by மகி Wed May 19, 2010 12:26 am

இந்தியாவின் வங்கித்துறை சேவையில் மறுமலர்ச்சியை ஏற்படுத்திய ஐ.சி.ஐ.சி.ஐ., வங்கி தனியார் வங்கிகளில் முன்னோடியாகத் திகழ்கிறது. சமீபத்தில் இந்த வங்கியின் 2 ஆயிரமாவது கிளையை மும்பையில் வங்கியின் நிர்வாக இயக்குனர் திறந்து வைத்துள்ளார்.

தனியார் வங்கிகளில் இவ்வளவு கிளைகளைக் கொண்டுள்ளதன் மூலம் ஐ.சி.ஐ.சி.ஐ., வங்கிக்கு அதன் வாடிக்கையாளர்கள் மீதான ஈடுபாடு வெளிப்படுவதாக அவர் தெரிவித்துள்ளார். இந்த நிகழ்ச்சியின் போது அவர் ஐ.சி.ஐ.சி.ஐ., வங்கி இந்த நிதியாண்டுக்குள் 5 ஆயிரம் முதல் 7 ஆயிரம் வரையிலான அளவில் புதிய பணி நியமனங்களைச் செய்யவுள்ளதாகத் தெரிவித்துள்ளார். வங்கியில் ஏற்கெனவே பணிபுரியும் ஊழியர்களுக்கு போனஸ், இன்க்ரிமென்ட் போன்ற சலுகைகள் தரப்பட்டுள்ளதாகவும் அவர் தெரிவித்துள்ளார். ஐ.சி.ஐ.சி.ஐ., வங்கியில் பணியாற்ற வேண்டும் என்ற விருப்பம் கொண்டவர்களுக்கு இந்த அறிவிப்பு பெரும் உற்சாகத்தைத் தந்துள்ளது.

தனது 2 ஆயிரமாவது கிளையைத் திறந்ததன் மூலம் தனியார் துறையில் இத்தனை கிளைகளைக் கொண்ட முதல் வங்கியாக ஐ.சி.ஐ.சி.ஐ., வங்கி புதிய அவதாரம் எடுத்துள்ளது. இந்த வங்கியின் கிளைகளில் 33 சதவிகிதம் மெட்ரோ நகரங்களிலும், 26 சதவிகிதம் இதர நகரங்களிலும், 41 சதவிகிதம் செமி-அர்பன் நகரங்களிலும் உள்ளன என்பது குறிப்பிடத்தக்கது.

நன்றி: தினமலர்.